តាកែវ៖ ព្រះប្រធានគណបក្សហ៊្វុនស៊ិនប៉ិច ព្រះអង្គម្ចាស់ នរោត្តម ចក្រាវុធ បានបង្ហាញនូវជំនឿថាតាមរយៈការចូលរួមដោះស្រាយ និងរួមចំណែកជួយដល់រាស្ត្រខ្មែរ និងធ្វើឱ្យកម្ពុជាកាន់តែឈានមុខរីកចម្រើនបន្ថែមទៀត។

មានព្រះបន្ទូលក្នុងពិធីសំណេះសំណាលជួបជុំ ជាថ្នាក់ដឹកនាំខេត្ត ស្រុក ឃុំ ជារចនាសម្ព័ន្ធគណបក្សហ៊្វុនស៊ិនប៉ិច ក្នុងខេត្តតាកែវ ព្រះអង្គម្ចាស់ នរោត្តម ចក្រាវុធ មានព្រះរាជបន្ទូលថា សមាជិក សមាជិកាបក្សទាំងអស់ មានបេសកកម្មជាច្រើនទៀត ដើម្បីបន្តចូលរួមដោះស្រាយ និងចូលរួមចំណែកជាមួយប្រជារាស្ត្រឱ្យមានភាពសម្បូរសប្បាយ ជីវភាពធូរធារ ដើម្បីឱ្យព្រះរាជាណាចក្រកម្ពុជាកាន់តែមានជឿនលឿនអភិវឌ្ឍទៅមុខ។

ក្នុងឱកាសនោះផងដែរព្រះអង្គម្ចាស់ក៏បានលើកទឹកចិត្តដល់បេក្ខភាពក្រុមប្រឹក្សាឃុំ-សង្កាត់របស់គណបក្សហ៊្វុនស៊ិនប៉ិចទាំងអស់ ដែលនឹងត្រូវចូលរួមបោះឆ្នោតខាងមុខនេះ ត្រូវនៅភ្ជាប់ខ្លួនជាមួយប្រជាជន រួមសុខទុក្ខ ការពារសមាជិកសមាជិកាជាម្ចាស់ឆ្នោត និងបំរើរាស្ត្រ ដោយភាពស្មោះត្រង់ គ្រប់ស្ថានការណ៍។

ការបោះឆ្នោតក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ នឹងចាប់ផ្ដើមនៅថ្ងៃទី៥ ខែមិថុនា ឆ្នាំ២០២២ ដើម្បីជ្រើសរើសសមាជិកក្រុមប្រឹក្សាថ្មីជំនួសក្រុមប្រឹក្សាឃុំសង្កាត់ចាស់ដែលផុតអាណត្តិ។

ដើម្បីចូលរួមបោះឆ្នោតនាពេលខាងមុខគណបក្សហ៊្វុនស៊ិនប៉ិចបានដាក់បេក្ខជនចំនួន ៩ ៤០៧នាក់ ក្នុងនោះស្រី ៣ ៥៨៩នាក់ ដែលជាគណបក្សទី៣ដែលបានដាក់បេក្ខជនច្រើនជាងគេសម្រាប់ការប្រកួតប្រជែង៕